Կամբոջայի Թագավորությունում ՀՀ դեսպան Վահրամ Կաժոյանի հանդիպումը Կամբոջայի Թագավորության Սենատի նախագահ, Կամբոջայի ժողովրդական կուսակցության փոխնախագահ Սամդեկ Վիբոլսենա Ֆեակդեյ Սայ Չհումի հետ:

19 օգոստոսի, 2022

2022 թ. օգոստոսի 19-ին Կամբոջայի Թագավորությունում ՀՀ դեսպան Վահրամ Կաժոյանը հանդիպեց Կամբոջայի Թագավորության Սենատի նախագահ, Կամբոջայի ժողովրդական կուսակցության փոխնախագահ Սամդեկ Վիբոլսենա Ֆեակդեյ Սայ Չհումի հետ:

Հանդիպման ժամանակ կողմերը քննարկեցին Հայատանի և Կամբոջայի միջև երկուստեք հետաքրքրություն ներկայացնող՝ մասնավորապես կրթության, զբոսաշրջության և առևտրա-տնտեսական ոլորտներում հարաբերությունների զարգացման ու խորացման, ինչպես նաև երկու երկրների խորհրդարանների միջև համագործակցության ընդլայնման և բազմաթիվ այլ հարցեր:

Զրուցակիցները գոհունակությամբ ընդգծեցին երկու երկրների միջև համագործակցությունը միջազգային կազմակերպությունների շրջանակներում՝ միևնույն ժամանակ կարևորելով իրավապայմանագրային դաշտի ընդլայնումը, ինչը թույլ կտա խորացնել քաղաքական և տնտեսական ոլորտներում հետագա հարաբերությունները:

Կամբոջայի Թագավորությունում ՀՀ դեսպան Վահրամ Կաժոյանը համառոտ ներկայացրեց ՀԽՍՀ-Կամպուչիա և ՀՀ-Կամբոջա հարաբերությունների պատմությունն, ինչպես նաև անդրադարձ կատարեց զբոսաշրջության ոլորտին՝ նշելով, որ մինչև 2019 թ. Կամբոջայի Թագավորություն այցելած հայ զբոսաշրջիկների թիվը տարեց տարի աճել է:

Դեսպան Կաժոյանը նաև կարևորեց 2021 թվականին Հայաստանում Կամբոջայի Թագավորության առաջին դեսպան Սեյլա Էատի նշանակումը (նստավայրը՝ Մոսկվա)՝ նշելով, որ թե՛ իր և թե՛ դեսպան Էատի օրակարգերը հիմնականում համընկնում են, ինչն ավելի է դյուրացնելու երկու դեսպանների աշխատանքը:

Հանդիպման ժամանակ զրուցակիցները կարևորեցին երկու խորհրդարանների միջև համագործակցության հաստատումը և խորացումը՝ ձեռք բերելով պայմանավորվածություններ շարունակել հանդիպումները՝ դեսպան Կաժոյանի Կամբոջա կատարելիք հետագա այցերի ընթացքում:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր